Biləsuvar rayonunda 2 Fevral-Gənclər günü münasibətilə tədbir keçirildi.

30 yanvar 2019-cu il tarixdə Biləsuvar  rayonunda 2 Fevral- Gənclər günü münasibətilə tədbir keçirildi.
Tədbirdə  Biləsuvar Rayon İcra Hakimiyyətinin başçısı Mahir Quliyev, hüquq-mühafizə orqanlarının, təhsil, idarə, müəssisə və təşkilatların  nümayəndələri  və rayonun ictimai-siyasi və mədəni həyatında fəallığı ilə seçilən gənclər, həmçinin rayon ərazisində yerləşən hərbi hissələrdə xidmət edən bir qrup əsgər və zabit iştirak etdi.
İlk öncə tədbir iştirakçıları  ulu öndər Heydər Əliyevin abidəsi önünə təzə tər-çiçək dəstələri qoydular, əziz xatirəsini bir dəqiqəlik sükutla yad etdilər. Tədbiri giriş sözü ilə açan  Gənclər və İdman idarəsinin rəisi Azad Quliyev rayon gənclərini   Gənclər Günü münasibətilə təbrik etdi və  gənclər gününün tarixi və ölkədə aparılan gənclər siyasəti barədə məlumat verdi.Bu sahədə rayonda görülən işlərdən danışdı, biləsuvarlı gənclərin   ötən dövr ərzində  əldə etdiyi nailiyyətlər barədə ətraflı məlumat verdi.
Tədbirdə çıxış edən   Biləsuvar rayon İcra Hakimiyyətinin başçısı cənab Mahir Quliyev gəncləri təbrik edərək qeyd etdi ki, hər  bir ölkənin, cəmiyyətin  həyatında  gənclərin rolu  əvəzsizdir. Çünki  gənclər  bizim  sabahımız, işıqlı gələcəyimizdir.Bu  mənada    Azərbaycanda  da   gənclər  cəmiyyətin  həyatında fəal iştirak edir, dövlət quruculuğu  işlərində, müstəqilliyimizin  və  dövlətçiliyimizin  inkişafına öz  dəyərli  töhvələrini  verirlər. Məhz  buna  görə  də  respublikamızda  aparıcı  qüvvə  olan gənclərə  həmişə böyük  diqqət  və  qayğı   göstərilir.
Biləsuvar Gənclərin İnkişaf və Karyera Mərkəzinin direktoru Səbinə Hüseynzadə, Biləsuvar Yeniyetmə və Gəncləri İctimai Birliyinin sədri Sahil Hüseynzadə, fəal gənc könüllü Əminə Əhmədzadə çıxış edərək bildirdilər ki, biləsuvarlı gənclər respublikamızın ictimai-siyasi həyatında həmişə öz fəallıqları ilə seçilmişlər. Respublika gənclərinin tərkib hissəsi olan biləsuvarlı gənclərimiz də cəmiyyətimizin   bütün sferasında  əzmkarlıq və  fədakarlıq göstərir, rayonumuzun ictimai-siyasi həyatında, aparılan  abadlıq və quruculuq  işlərində yaxından iştirak edirlər.
Tədbirdə rayonun ictimai-siyasi və mədəni həyatında fəallıq göstərən, müxtəlif sahələrdə nailiyyətlər qazanmış gənclər fəxri fərmanla təltif edildilər. Bədii hissədə  gənc müğənnilərin ifasında bəstəkar mahnıları,  musiqi parçaları, həmçinin, müxtəlif musiqi alətlərində gənclərin ifaları təqdim edildi.