Biləsuvarda “Vətənpərvər Azərbaycan gəncliyi – Sağlam gənclik, sağlam gələcək” mövzusunda tədbir keçirilib.
Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) təşkilatçılığı, Biləsuvar Rayon İcra Hakimiyyətinin dəstəyi ilə Biləsuvar Gənclər evində gənclər üçün tədbir keçirilib.
“Vətənpərvər Azərbaycan gəncliyi – Sağlam gənclik, sağlam gələcək” mövzusunda keçirilən görüşdə Biləsuvar Rayon İcra Hakimiyyətinin başçısı Faiq Qürbətov, rayonun hüquq-mühafizə orqanlarının rəhbərləri, şəhid ailələri, Vətən Müharibəsi iştirakçıları, məktəblilər və digər nümayəndələr iştirak ediblər.
Biləsuvar Rayon İcra Hakimiyyətinin başçısı Faiq Qürbətov çıxış edərək bildirib ki, vətənpərvər, intellektual və sağlam gənclik hər bir xalqın xoşbəxt gələcəyə olan ümidinin rəhnidir. İcra başçısı 44 günlük Vətən müharibəsi zamanı Ulu Öndər Heydər Əliyevin layiqli davamçısı Prezident cənab İlham Əliyevin müdrik idarəçiliyinin və yürütdüyü qətiyyətli siyasətinin məntiqi nəticəsi olaraq yetişən vətənpərvər gənclərimizin misilsiz igidlik, şücaət göstərərək torpaqlarımızı azad edərək, yüz minlərlə keçmiş məcburi köçkünün yurd həsrətinə son qoyduğunu, xalqımızı məğlubiyyət uçurumundan qalibiyyət zirvəsinə ucaltdıqlarını diqqətə çatdırıb.
Faiq Qürbətov ölkəmizdə həyata keçirilən uğurlu gənclər siyasətindən, yeni inkişaf mərhələsinə qədəm qoyan Azərbaycan gəncliyinin inkişafı üçün yaradılan əlverişli şəraitdən, dövlətimizin müəyyən etdiyi strateji vəzifələrin icrasında gənclərimizin fəal iştirakından bəhs edərək, bu gün gənc nəslin hərtərəfli inkişafı üçün yaradılan şəraitə görə, eyni zamanda Vətən müharibəsi iştirakçılarına, şəhid ailələrinin üzvlərinə, sağlamlıqlarını itirən qazilərimizə göstərilən yüksək dövlət qayğısına görə Ölkə Başçısı cənab İlham Əliyevə və Birinci vitse-prezident Mehriban xanım Əliyevaya minnətdarlığını bildirdi.
Tədbirdə çıxış edən SHXÇDX-nın Çağırışaqədərki hazırlıq idarəsinin rəisi polkovnik-leytenant Füzuli İsmayılov, SHXÇDX-nın Biləsuvar rayon şöbəsinin rəisi Rəfail Xəlilov, Biləsuvar rayonu üzrə gənclər və idman sektorunun müdiri Azad Quliyev, şəhid atası Rafət İsayev, qazilər müharibə zamanı gənclərin vətənpərvərliyindən danışıb, sabahın əsgəri olacaq çağırışçıların fiziki və psixoloji statuslarının yüksək səviyyədə saxlanılmasının qarşıda duran əsas vəzifələrdən biri olduğunu vurğulayıb, həmçinin yeniyetmə və gənclər arasında sağlam həyat tərzinin təbliği, onların həyat üçün zərərli vərdişlərdən uzaqlaşdırılması istiqamətində həyata keçirilən tədbirlər barədə məlumat veriblər.
Tədbir müsiqili hissə ilə davam edib.
