Biləsuvarda “Səyyar Gənclər Xidməti” layihəsi təqdim edilib.
26 noyabr 2024 | 13:09
Azərbaycan Respublikası Gənclər Fondunun “Yaşıl dünya naminə həmrəylik ili”nə həsr edilmiş “Səyyar Gənclər Xidməti” layihəsi çərçivəsində keçirilən tədbirdə Biləsuvar Rayon İcra Hakimiyyətinin başçısı Faiq Qürbətov, Azərbaycan Gənclər Fondunun icraçı direktoru vəzifəsini icra edən Qədir Xəlilov və rayon gəncləri iştirak edib.
Tədbirdən öncə Azərbaycan Respublikasının Dövlət Himni səsləndirilib, torpaqlarımızın azadlığı uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edilib.
Rayonun Bəydili kənd tam orta məktəbində keçirilən tədbirdə çıxış edən Biləsuvar rayon İcra Hakimiyyətinin başçısı Faiq Qürbətov qonaqları salamlayaraq bu səpkili tədbirlərin keçirilməsinin gənclərin dünyagürüşünün artmasında, onların müxtəlif bilik və bacarıqlara yiyələnməsində böyük əhəmiyyət daşıdığını qeyd edib.
Gənclər Fondunun icraçı direktoru vəzifəsini icra edən Qədir Xəlilov “Səyyar Gənclər Xidməti” layihəsi haqqında məlumat verərək, bildirib ki, layihə çərçivəsində respublikanın müxtəlif rayonlarında gənclərin gələcək həyata hazırlanması, onların yetişkin və savadlı bir Azərbaycan gənci olaraq yetişməsi istiqamətində böyük rol oynayır.
Tədbir boyu ekologiya (COP29), vətənpərvərlik, sahibkarlıq, karyera və rəqəmsal alətlərdən effektiv istifadə mövzularında peşəkar şəxslərlə, eləcə də, bir sıra tərəfdaş qurumların nümayəndələri ilə gənclərin görüşləri təşkil edilib, “Gənclər siyasəti və dövlətçilik”, “Zərərli vərdişlərə yox deyək”, “Peşə seçimi və karyera” və “Sağlam və təhlükəsiz həyat” mövzularında təlim sessiyaları keçirilib.
Tədbir zamanı STEAM formatlı innovativ sərgisi, Gənclərin “Yaşıl dünya naminə həmrəylik ili”nə həsr edilmiş əl işləri (süni intellekt alətləri ilə yaratdıqları təsvirlər və rəsm əsərləri), CV xidməti (gənclər üçün şəxsi anketin yaradılması xidməti) və Virtual eynək (VR box) ilə virtual səyahət təşkil edilib, müxtəlif masterklasslar təqdim olunub.
Sonra gənclər arasında müxtəlif bilik yarışmaları və əyləncəli oyunlar keçirilib.
Keçidlər
