Biləsuvarda “Hind toyuğu festivalı” keçirilib
27 noyabr 2023 | 17:22
Biləsuvar şəhər Mərkəzi Parkında Rayon İcra Hakimiyyətinin və "Azər Home Chef" şirkətinin birgə təşkilatçılığı ilə keçirilən “Hind toyuğu festivalı”nda Biləsuvar rayon İcra Hakimiyyətinin başçısı Faiq Qürbətov, Mill Məclisin deputatları Bəhruz Məhərrəmov, tədbirin təşkilatçıları, rayonumuzun sakinləri, yerli və xarici qonaqlar, respublikanın ən məşhur aşpaz və dequstatorları iştirak edib.
Tədbir zamanı iştirakçıları salamlayan Biləsuvar Rayon İcra Hakimiyyətinin başçısı Faiq Qürbətov festivalın Biləsuvar rayonunda keçirilməsinin artıq üçüncü il olduğunu qeyd edərək bildirib ki, festival rayonda turizmin inkişafına maraq baxımından böyük əhəmiyyət daşımaqla yanaşı, həm də milli mətbəximizin, adət-ənənələrimizi təbliğinə xidmət göstərir.
Festival zamanı hind toyuğundan hazırlanmış onlarla müxtəlif çeşidli təamlar rayonumuzun sakinlərinə və qonaqlarımıza təqdim olunub.
Tədbirin rəngarəng olması məqsədilə festivalda həmçinin müxtəlif səpgili tədbirlər, idman oyunları keçirilib, yerli kənd məhsullarından ibarət satış yarmarkası təşkil edilib, əl işlərindən ibarət sərgilər və rəsm əsərləri nümayiş olunub.Ən dadlı təamlar hazırlayan həvəskar aşpazlar münsiflər tərəfindən qiymətli hədiyyələrlə mükafatlandırılıb.
Festival zamanı respublikanın və rayonumuzun musiqiçiləri tərəfindən hazırlanmış geniş konsert proqramı təqdim olunub və tədbirin sonunda möhtəşəm atəşfəşanlıq keçirilib.
Keçidlər
