Biləsuvarda Azərbaycan Respublikasının Dövlət Müstəqilliyinin bərpasının 28-cİ ildönümünə həsr olunmuş tədbir keçirildi.

18 oktyabr 2019-cu il tarixdə Biləsuvar rayonunda Azərbaycan Respublikasının Dövlət Müstəqilliyinin bərpasının 28-ci ildönümünə həsr olunmuş tədbir keçirildi.
Heydər Əliyev Mərkəzində  keçirilən tədbirdə Biləsuvar rayon İcra Hakimiyyətinin Başçısı Mahir Quliyev, İcra  Hakimiyyəti  başçısı  aparatının əməkdaşları, hüquq mühafizə orqanlarının, idarə, müəssisə, təşkilatların rəhbərləri, rayon ağsaqqalları, gənclər və kütləvi informasiya vasitələrinin nümayəndələri  iştirak etdi.
Tədbir iştirakçıları əvvəlcə Ulu Öndər  Heydər Əliyevin   abidəsini ziyatət edib, əziz xatirəsinə gül dəstələri qoydular.
Tədbirdə Azərbaycan Respublikasının Dövlət Himni səsləndirildikdən sonra müstəqilliyimizdən bəhs edən fideo-rolik nümayiş olundu.
Biləsuvar rayon İcra hakimiyyətinin başçısı Mahir Quliyev   geniş məruzə ilə çıxış edərək bildirdi ki,  bu gün Azərbaycan Respublikasının  dövlət müstəqilliyinin bərpa edilməsinin 28-ci ildönümünü Azərbaycan xalqı və bütün dünya azərbaycanlıları böyük təntənə ilə qeyd edir. Bu, xalqımızın əsrlər boyu arzusunda olduğu  çox möhtəşəm   tarixi  nailiyyətdir.Azərbaycan xalqı milli dövlətçiliyi tarixində ikinci dəfə müstəqilliyinə qovuşana qədər uzun tarixi  bir yol keçmişdir.  XX əsrdə Azərbaycan xalqının ən böyük nailiyyəti isə məhz, bu müstəqilliyin qazanılmasıdır.  Öz müstəqilliyini bərpa edən ölkəmiz artıq demokratik, hüquqi, dünyəvi dövlətin möhkəm təməlini qoymuşdur.Azərbaycan xalqı uzun illər böyük bir imperiyanın tərkibində olmasına baxmayaraq dilini, milli-mənəvi  dəyərlərini və mədəniyyətini göz bəbəyi kimi qoruyub saxlaya bilmişdir.Ona görə də XX  əsr xalqımızın yaddaşında dövlətçilik, müstəqillik, ərazi bütövlüyü uğrunda mübarizə əsri kimi qalacaqdır.                                                                                                         
    M.Quliyev bildirdi ki,1991-ci ilin 18 oktyabr tarixində Azərbaycan Respublikasının dövlət müstəqilliyinin elan edilməsi və “Azərbaycan Respublikasının dövlət müstəqilliyi haqqında Konstitusiya Aktı”nın qəbul olunması müstəqil  dövlətçilik  yolunda yeni bir mərhələnin başlanğıcı idi. “Azərbaycan Respublikasının dövlət müstəqilliyi haqqında Konstitusiya Aktı”nın qəbul  edilməsi ilə hüquqi əsası qoyulan müstəqilliyimiz, məhz, dahi şəxsiyyət,ulu öndərimiz Heydər Əliyevin hakimiyyətə ikinci dəfə qayıdışı ilə  möhkəmlənmişdir.
1993-cü ildə müdrik Heydər Əliyevin yenidən ölkə rəhbərliyinə qayıdışı ilə respublikamızın ictimai-siyasi, sosial-iqtisadi, elmi-mədəni həyatında, beynəlxalq əlaqələrində əsaslı dönüş yarandı, müstəqil dövlət quruculuğu prosesi başlandı.Müstəqilliyimizin xalqımız üçün tarixi əhəmiyyətindən danışan Ulu öndər Heydər Əliyev deyirdi: “Azərbaycanın dövlət müstəqilliyi bizim üçün ən əziz, ən qiymətli hədiyyədir və biz bu nailiyyəti – dövlət müstəqilliyimizi daim qoruyub saxlayacayıq. Müstəqilliyin əldə olunması nə qədər çətindirsə, onun saxlanması, daimi və əbədi olması bundan də çətindir...”
1995-ci ilin noyabr ayının 12-də müstəqil Azərbaycan  Respublikasının Konstitusiyası qəbul edildi və  müstəqillik tariximizdə  ilk parlament seçkiləri keçirildi. Müstəqil  Azərbaycan Konstitusiyası ölkəmizdə yeni dövlət quruculuğu üçün dövlət fəaliyyətinin və cəmiyyətin inkişafının gələcək  modelinin hüquqi əsasını yaratdı.Ulu Öndərin milli maraqlara əsaslanmaqla həyata keçirdiyi çoxşaxəli siyasət  strategiyası bu gün onun layiqli varisi, Azətbaycan Respublikasının Prezidenti  cənab İlham Əliyev tərəfindən inamla və qətiyyətlə davam etdirilir. Ötən illər  ərzindəki fəaliyyəti dövlət başçısının verdiyi bütün vədlərin əməli fəaliyyətə çevrildiyini tamamilə təsdiqləmişdir.Hər birimiz böyük qürur  duyuruq ki, müstəqil ölkəmiz bu gün regionun ən güclü ordusuna, ən  sabit iqtisadiyyatına və ən böyük inkişaf potensialına sahib olan bir dövlətdir.
M.Quliyev çıxışında respublikamızın bir güşəsi olan Biləsuvar rayonunun da müstəqilliyimizin 28 ili ərzində böyük bir inkişaf yolu keçdiyini bildirməklə qeyd etdi ki, bu gün rayonumuz respublikamızın abad, yaraşıqlı və müasir bir bölgəsi olmaqla, öz simasını dəyişir, yeni-yeni tikintilər həyata keçirilir, infrastruktur layihələri icra olunur. Aparılan bu geniş abadlıq və quruculuq işləri ilə yanaşı, özəl sektorun və sahibkarlığın inkişaf etdirilməsi, yeni iş yerlərinin açılması böyük razılıq hissi ilə qarşılanır.
Çıxışının sonunda rayon icra Hakimiyyətinin başçısı Mahir Quliyev Azərbaycanın Dövlət Müstəqilliyi bayramı münasibətilə bir daha rayon əhalisini təbrik etdi və xalqımızı müdrik  Prezidentimizin ətrafında daha sıx birləşərək müstəqilliyimizin daimi və əbədi olması yolunda əzmlə çalışmağı arzuladı.
Tədbirdə çıxış edənlər Dövlət Müstəqilliyimizin bərpasının 28 illiyi münasibətilə təbriklərini bildirdilər.
Tədbirdə Dövlət Müstəqilliyimizə həsr olunmuş rəsm sərgisinə baxış keçirildi və ədəbi-bədii kompazisiya nümayiş olundu.