Biləsuvar rayonunda 31 mart-Soyqırımı qurbanlarının xatirəsi anıldı.

30 mart 2019-cu il tarixdə  Biləsuvar rayonunda 31 mart – Azərbaycanlıların soyqırımı ilə bağlı silsilə tədbirlər  keçirildi.
Keçirilən tədbirlərdə Biləsuvar  rayon İcra hakimiyəti başçısının müavini Ləman xanım Yüzbaşova, rayon Təhsil, Gənclər və İdman, Mədəniyyət idarələrinin kollektivləri və gənclər iştirak etdi.
Tədbir iştirakçıları Biləsuvar şəhər 4 saylı tam orta məktəbdə yerləşən “Şəhidlərin xatirə Lövhəsi” önünə tər çiçəklər qoydular, əziz xatirələrini yad etdilər.
Tədbirdə Biləsuvar rayon icra Hakimiyyəti  Başçısının müavini Ləman xanım Yüzbaşova çıxış edərək bildirdi ki, ermənilərin “Böyük Ermənistan” yaratmaq kimi qondarma ideyalarının gerçəkləşməsi yolunda atdıqları addımlar daima azərbaycanlılara qarşı kütləvi qətillərin və soyqırım aktlarının reallaşması ilə nəticələnib. Bu qanlı tarix qısa fasilələrlə bütün 20-ci əsr boyu dönə-dönə təkrarlanmışdır.Ermənilər nəyin bahasına olursa-olsun Azərbaycan torpaqlarında məskunlaşaraq bu torpaqların onlara aid  olduqlarını təsdiqləməyə çalışırlar. Bu mənfur niyyəti reallaşdırmağın yolu isə azərbaycanlıların kütləvi soyqırımından, qanlı talanlardan və deportasiya siyasətindən keçirdi. 1918-ci ilin martında Bakıda və Azərbaycanın digər bölgələrində həyata keçirilən dəhşətli soyqırımı aktı ermənilərin Qafqazda məskunlaşması üçün bir açar oldu. Onlar bu vəhşi əməlləri ilə bir növ bu bölgədə yaşamaq və Azərbaycan türklərinin tarixi vətəni olan indiki Ermənistan ərazisində dövlət qurmaq niyyətlərini reallaşdırdılar.Bu müddət ərzində erməni vəhşiliklərinin nəticəsində yüz minlərlə dinc sakinlərimiz, qocalarımız, qadınlarımız, uşaqlarımız öldürülmüş, ölkəmizə yüz milyardlarla manatlıq ziyan vurulmuş, yüzlərlə kəndlərimiz, şəhərlərimiz məhv edilmişdir.Azərbaycan müstəqillik qazandıqdan sonra xalqımızın tarixi keçmişinin uzun illər gizli saxlanılan, üzərinə qadağa qoyulan həqiqətləri açıldı, təhrif edilən  hadisələr əsil qiymətini aldı. Ümummilli lider Heydər Əliyev 1998-ci il martın 26-da imzaladığı fərmanla 31 mart Azərbaycanlıların Soyqırım günü elan edildi. Təsadüfi deyil ki, bu proses sonrakı mərhələdə Azərbaycanın xarici siyasətinin əsas istiqamətlərindən biri kimi müəyyənləşdi. Azərbaycan Prezidentinin yürütdüyü uğurlu xarici siyasət nəticəsində artıq dünya və beynəlxalq təşkilatlar Ermənistanı işğalçı dövlət kimi tanıdı.Erməni vəhşilikləri Azərbaycan tarixinin qanla yazılmış səhifəsi olsa da, güclü Azərbaycan yerləşdiyi bölgədə söz və nüfuz sahibi olmaqla bütün problemlərin öhdəsindən hər zaman uğurla gəlmək iqtidarındadır.
L.Yüzbaşova çıxışında Azərbaycan Respublikasının  Prezidenti, Ali Baş Komandan cənab İlham Əliyevin uzaqgörən daxili və xarici siyasəti sayəsində torpaqlarımızın yaxın zamanlarda düşmən tapdaqlarından  azad olunacağını bildirərək qeyd etdi ki, o gün üçrəngli bayrağımız işğal altında olan şəhər və rayonlarımızda vüqarla dalğalanacaqdır.
Tədbirdə çıxış edənlər  milliətçi-separatçı ermənilərin Dağlıq Qarabağda yürütdükləri qəsbkarlığı nəticəsində 20 faiz Azərbaycan torpaqlarının işğal olunmasını, bir milyondan artıq soydaşımızın doğma ocaqlarından didərgin düşməsini, minlərlə insanın şəhid olması faktını bir daha xatırladaraq, bu qan yaddaşının unudulmaması, xalqın tarixinin dərindən öyrənilərək gələcək nəsillərə çatdırılması, şüurlara əbədi həkk olunmasının gənclərin vətənpərvərlik tərbiyəsində əsas şərt olduğu qeyd etmişlər.
Bildirildi ki, 31 mart-Azərbaycanlıların soyqırımı günü rayonun bütün ümumtəhsil məktəblərində, mədəniyyət müəssisələrində qeyd olunur və erməni vəhşilərinin zaman-zaman xalqımızın başına gətirdiyi müsibətlər  gələcək nəsillərin diqqətinə çatdırılır.
Sonda 31 mart- Azərbaycanlıların Soyqırımından bəhs edən qısametrajlı film nümayiş olundu və rəsm sərgisinə baxış keçrildi.