Biləsuvarda 26 iyun-Silahlı Qüvvələr Gününə həsr olunmuş tədbir keçirildi.

24 iyun 2016-cü il tarixdə Biləsuvar şəhər Mədəniyyət evində  26 iyun- Azərbaycan Respublikasının Silahlı Qüvvələr  Gününə   həsr olunmuş  tədbir keçirildi.
Tədbirdə Biləsuvar rayon İcra Hakimiyyəti Başçısının müavini Xəyalə Qəmbərova, Gənclər və İdman idarəsinin rəisi Aqşin Bağırov, Mədəniyyət və Turizm şöbəsinin müdiri Rəfiqə Cəfərova, Səfərbərlik və Hərbi Xidmətə Çağırış üzrə Dövlət Xidmətinin Biləsuvar rayon şöbəsinin rəis müavini Ramil Sultanov və çağrışcı gənclər iştirak etdi.
Tədbir Azərbaycanın Dövlət Himninin səsləndirilməsi ilə başladı.
Tədbirdə Biləsuvar rayon İcra Hakimiyyəti Başçısının müavini Xəyalə Qəmbərova çıxış edərək   Milli Ordumuzun yaranmasının 98-ci ildönümü münasibətilə  iştirakçıları təbrik etdi və ölkəmizdə ordu quruculuğu ilə bağlı görülən işlər barədə məlumat verdi.Bildirdi ki, “Ulu Öndərimiz Heydər Əliyev hələ SSRİ dövründə və müstəqillikdən sonra Azərbaycana rəhbərlik edərkən ordu quruculuğu, hərbi kadrların hazırlığı məsələsinə xüsusi diqqət yetirmişdir. Ümummilli lider 1971-ci ildə böyük səylər nəticəsində general Cəmşid Naxçıvanski adına hərbi məktəbin açılmasına nail oldu. Eyni zamanda Heydər Əliyev azərbaycanlı gənclərin Bakı Ali Birləşmiş   Komandanlıq və Bakı Ali Hərbi Dənizçilik məktəblərində və eləcə də SSRİ-nin digər məktəblərində oxuması üçün tədbirlər gördü. Heydər Əliyevin SSRİ dövründəki ordu quruculuğu siyasəti müstəqillik qazandıqdan sonra da öz bəhrəsini vermişdir. Bu gün Azərbaycanın qüdrətli və nizami orduya malik olması məhz ümummilli lider Heydər Əliyevin gərgin əməyinin bəhrəsidir. Ali Baş Komandanımız İlham Əliyev cənabları da Ulu Öndərin ideyalarını layiqincə yerinə yetirərək ordu quruculuğu sahəsində öz səylərini daha da artıraraq Azərbaycan Silahlı Qüvvələrinin müasir hərbi texnika ilə təchiz edilməsinə, möhkəm nizam-intizam, yüksək döyüş ruhu ilə seçilən, düşmənə sarsıdıcı zərbə vurmağa qadir olan bir ordu yaradılmasına nail olmuşdur.Elə bu ilin aprel ayının ilk günlərində ordumuz tərəfindən erməni qəsbkarlarına verilən tutarlı cavab bir daha bizim ordumuzun nəyə qadir oldugunu dünyaya göstərdi. Qafqazda ən müasir ordu hesab olunan Azərbaycan Milli Ordusu Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. MDB çərçivəsində Azərbaycan hava hücumundan müdafiə qüvvələrinə malik ən güclü ölkələrdən sayılır. Ordumuzun gücünü artıran, hərbçilərimizin döyüş əhval-ruhiyyəsini yüksəldən əsas amillərdən biri də ölkə Prezidenti, Silahlı Qüvvələrin Ali Baş Komandanı İlham Əliyevin hərbi hissələrə, xüsusən cəbhə xəttinə ardıcıl səfərlər etməsidir. Ön xətdə xidmət edən əsgər və zabitlərimizlə hər görüşündə onlara sonsuz mübarizə əzmi aşılayan Ali Baş Komandan bununla da orduya diqqət və qayğısını əyani şəkildə nümayiş etdirir.
Tədbirdə Biləsuvar rayon Gənclər və İdman İdarəsinin rəisi Aqşin Bağırov və digər natiqlər çıxış edərək  gəncləri Silahlı Qüvvələr Günü münasibətilə təbrik etdilər. Qeyd olundu  ki, Azərbaycan Silahlı Qüvvələrinin yaradıldığı 26 iyun  ölkəmizdə ümumxalq bayramı kimi təntənəli şəkildə qeyd edilir.
Ulu öndər Heydər Əliyevin ordu quruculuğu, eləcə də milli təhlükəsizlik siyasəti ilə bağlı başladığı işlər onun siyasi kursunun layiqli davamçısı, Azərbaycan Respublikasının Prezidenti İlham Əliyev tərəfindən uğurla davam etdirilir. Ali Baş Komandanın Ermənistan-Azərbaycan, Dağlıq Qarabağ münaqişəsinin sülh yolu ilə həllinin mümkün olmayacağı təqdirdə xalqın öz torpaqlarını azad etmək üçün silaha sarılacağını gizlətmir və Silahlı Qüvvələrin buna tam qadir olduğunu bəyan edir: Prezidentimizin “Bizim ordumuz istənilən vaxtda torpaqlarımızı düşməndən azad etməyə qadirdir" fikri tədbirdə bir daha qeyd olundu.
 Sonda rayonun incəsənət ustalarının  ifasında səslənən vətənpərvərlik ruhunda mahnılar, çağırışçı gənclərin  rəqsləri  tədbir iştirakçıları tərəfindən alqışlarla qarşılandı.