Biləsuvar rayonunda 12 Noyabr - Konstitusiya gününə həsr olunmuş tədbir keçirildi.

12 noyabr 2015-ci il tarixdə  Biləsuvar rayonunda 12 Noyabr  - Konstitusiya gününə həsr olunmuş tədbir keçirildi.
Tədbirdə Biləsuvar rayon İcra Hakimiyyətinin başçısı  Mahir Quliyev, hüquq-mühafizə orqanlarının, idarə, müəssisə, təşkilatların rəhbərləri, ziyalılar, gənclər və KİV nümayəndələri iştirak etdilər.
Tədbir iştirakçıları əvvəlcə Heydər Əliyev  parkında  Ulu Öndərin abidəsini ziyarət etdilər, əziz xatirəsinə tər çiçəklər qoyuldu. Tədbirdə Azərbaycan Respublikasının Dövlət Himni səsləndirildi.
Tədbiri giriş sözü ilə açan rayon İcra Hakimiyyətinin Başçısı Mahir Quliyev  Konstitusiya Günü münasibətilə iştirakçıları təbrik etdi, demokratik dövlət və cəmiyyət quruculuğu baxımından böyük əhəmiyyət daşıyan, Ulu Öndər Heydər Əliyevin müəllifi olduğu ilk Milli Konstitusiyamızın qəbul olunması tarixindən danışdı.
M.Quliyev qeyd etdi ki, 1995-ci il noyabrın 12-də ümumxalq səsverməsi-referendum yolu ilə Konstitusiyanın qəbul edilməsi Azərbaycanın müstəqillik illərinin ən mühüm nailiyyətlərindən biri olmuş, ölkəmizdə demokratik, hüquqi dövlət quruculuğu istiqamətində yeni mərhələnin əsasını qoymuşdur.
Azərbaycan dövləti üçün çətin sınaq illərində  məhz Ulu Öndər Heydər Əliyev ölkə vətəndaşlarını azərbaycançılıq ideyası ətrafında birləşdirməyə,  dövlət və cəmiyyət həyatının bütün sahələrini əhatə edən geniş miqyaslı islahatların reallaşdırılmasına başladı.Ulu Öndərin Azərbaycanın hərtərəfli tərəqqisinə yönəlmiş müdrik dövlətçilik siyasətinin mühüm tərkib hissəsi kimi yeni Konstitusiyanın qəbul edilməsi ölkəmizin həyatında müstəsna əhəmiyətli hadisə olmuşdur.1994-cü ilin axırları 1995-ci ilin əvvəllərində  Müstəqil Azərbaycan Respublikasının  ilk Konstitusiyasının yaradılması ilə bağlı  məsələ gündəmə gəldi. Prezident  Heydər Əliyevin sədrliyi ilə xüsusi   komissiyas təşkil edildi. Konstitusiya komissiyasının sədri Prezident Heydər Əliyevin rəhbərliyi ilə keçən  komissiyanın ilk iclasında  layihədə ümumbəşəri dəyərlərin, xalqın tarixi keçmişinin və son illərin təcrübəsinin ciddi nəzərə alınması  bir vəzifə olaraq qarşıya qoyuldu. Birmənalı şəkildə  demək olar ki, layihənin müəllifi ümummilli lider Heydər Əliyevin özü idi. Hər bir fəsil və maddənin yazılmasına qədər gərgin əmək sərf edən Ulu Öndərin müəllifi olduğu bu layihə 1995-ci ilin oktyabrın 15-də ümumxalq müzakirəsi üçün mətbuatda dərc olundu. Cəmiyyətin demək olar ki, bütün təbəqələri müzakirələrə cəlb edildi . Təkliflər nəzərə alınmaqla layihənin yekun variantı  1995-ci ilin noyabrın 12- də referendum yolu ilə qəbul edildi. Azərbaycanın ilk konstitusiyası dövlət hakimiyyətinin  hakimiyyətlərin bölgüsü prinsipi  əsasında təşkil olunduğunu müəyyən etdi. Təkcə bir faktı demək kifayətdir ki,  Konstitusiyanın 158  maddəsindən  57-sində   insan hüquq və azadlıqları təsbit edilirdi ki, bu da gənc müstəqil Azərbaycanın demokratik və hüquqi cəmiyyət qurmaq məramında olduğunu təsdiq edirdi. Bu Heydər Əliyev konstitusiyası idi ki,  onun əsas prinsipləri azad və müstəqil Azərbaycanın  uzunmüddətli  gələcəyinə hesablanmışdı. İlk Konstitusiyamız, eyni zamanda  xalqımızın dünyəvi, milli – mənəvi prinsipləri rəhbər tutaraq seçdiyi gələcək yolun ifadəsi idi.
Zaman keçdikcə Əsas Qanuna əlavə və dəyişikliklərin edilməsi, onun müasir tələblərə uyğunlaşdırılması demokratik inkişaf yolunda olan bütün dövlətlər üçün səciyyəvi haldır. 2002–ci ildə  Azərbaycan Konstitusiyasında dəyişiliklər edilməsinə yaranan ehtiyac da  məhz bütün sahələrdə nəzərə çarpan sürətli inkişafdan irəli gəlirdi. Həmin il ilk dəfə keçirilən Konstitusiya islahatlarından sonra respublikanın ictimai–siyasi həyatında fundamental dəyişikliklər–iqtisadi, siyasi, hüquqi islahatların dərinləşməsi, demokratikləşmə prosesinin sürətlənməsi və digər  yeniliklər  Azərbaycan Konstitusiyasında yenidən bir sıra əlavə və dəyişiklikləri obyektiv tələbata çevirdi. 2009-cu il martın 18-də Əsas Qanundakı əlavə  və dəyişikliklərə münasibəti öyrənən ümumxalq  səsverməsi  Prezident İlham Əliyevin demokratikləşmə və liberallaşmaya xidmət edən, insan hüquqlarının qorunmasında əlavə imkanlar açan siyasətinin xalq tərəfindən birmənalı şəkildə dəstəkləndiyini  bir daha təsdiq etdi.
Dövlətimizin Əsas Qanunu olan Konstitusiyamıza dönmədən əməl olunması istiqamətində ölkə Prezidenti cənab İlham Əliyevin həyata keçirdiyi ardıcıl siyasət dövlətçiliyimizin əsaslarının möhkəmləndirilməsi və inkişaf etdirilməsi üçün real zəmin yaradır. Məhz cənab Prezidentin konstitusiyamızda öz əksini tapmış müdəalara uyğun olaraq verdiyi qərarlar, yürütdüyü daxili və xarici siyasət, etdiyi çıxışlar və atdığı addımlar bunu deməyə əsas verir. Təkcə cari il ərzində dövlətimizin və xalqımızın inkişafı, xüsusilə də ölkəmizdə mülkiyyət münasibətlərinin tənzimlənməsi və bunula əlaqədar sahibkarlıq subyetlərinin sərbəst və maneəsiz fəaliyyətinin təmin olunması istiqamətində cənab Prezidentin imzaladığı fərman və sərəncamlar bunun bariz nümunələridir. Belə ki,  uzun illər ölkə iqdisadiyatının aparıcı qüvvəsi olan sahibkarlıq sübyektlərinin fəaliyyətinə qeyri-qanuni müdaxilələrin, onların fəaliyyətinin bu və ya digər bəhanələrlə ləngidilməsinin, sahibkarlıq fəaliyyəti ilə məşğul olanlara süni maneələrin yaradılıması ilə bağlı əməllərin ifşa olunması kimi tarixi addımlar Azərbaycan dövlətinin və onun liderinin dövlətimizin konstitusion əsaslarına olan  mütərəqqi münasibətindən xəbər verir. Artıq hər bir vətəndaşımızın öz sahibkarlıq istəyini gerçəkləşdirilməsi üçün müvafiq prosedur qaydaların asanlaşdırılması, onlara aidiyyəti üzrə lisenziyaların verilməsi işinin sadələşdirilməsi, hələ uzun illər əvvəl-Sovetlər ittifaqı zamanı ölkə vətəndaşlarına verilmiş torpaq üzərində mülkiyyət münasibətləri ilə bağlı sənədlərin  rəsmiləşdirilməsi qaydalarının sadələşdirilməsi  cənab Prezident tərəfindən ölkəmizin gələcək inkişafına hesablanmış tarixi addımlardır.
Tədbirdə M.Quliyev qeyd etdi ki, bu gün əhalisinin sayı 100 min nəfərə çatmaqda olan Biləsuvar rayonunun sakinləri  də  Konstitusiyamızın 20-ci ildönümünü sonsuz sevinc və iftixar hissi ilə qeyd edirlər. Konstitusiyamızın bizə verdiyi hüquqlardan istifadə edən hər bir biləsuvarlı bu gün möhtərəm prezidentimiz cənab İlham Əliyevin ətrafında sıx birlik nümayiş etdirir, ölkəmizdə, o cümlədən rayonumuzda geniş miqyas almış abadlıq, quruculuq işlərində yaxından iştirak edirlər. Günbəgün inkişaf  və tərəqqi edən Biləsuvar rayonunun sakinləri ölkə prezidenti İlham Əliyevin Azərbaycan vətəndaşlarına   göstərdiyi yüksək diqqət və qayğıdan ruhlanaraq vətənimizin qüdrətlənməsinə öz töhvələrini verirlər.

  Sözsüz ki, həyat və zaman dəyişdikcə gələcəkdə də dövlətin hüquqi sistemində, onun Konstitusiyasında təkmilləşmə, islahatlar yenə zəruri olacaqdır. Amma əsas olanı odur ki, bu dəyişikliklər nəticə etibarilə ilə  dövlətimizin güclənməsinə, ölkə vətəndaşlarının hüquqlarının, şəxsi rifahının daha möhkəm təminatına səbəb olacaqdır.
Ən böyük diləyimiz isə, təbii ki, Əsas Qanunumuzun təməl müddəalarının ölkəmizin bütün ərazisində bərqərar olması, Konstitusiyanın 11-ci maddəsində  təsbit olunmuş «Azərbaycan Respublikasının ərazisi vahiddir, toxunulmazdır və bölünməzdir» prinsipinin gerçəkdə öz əksini tapmasıdır.
Əminik ki, dövlət müstəqilliyimizin  qarantı olan  respublikamızın Prezidenti cənab İlham Əliyevin rəhbərliyi altında yaxın gələcəkdə ərazi bütövlüyümüz təmin ediləcək və Konstitusiyamızda öz əksini tapmış bu müddəa bir daha öz təsdiqini tapacaqdır.
Tədbirdə Biləsuvar rayon Prokuroru Qabil Əliyev, Dəvrişli kənd icra nümayəndəsi Sakit Şərbətov,Milli Qəhraman Mübariz İbrahimov adına Biləsuvar Liseyinin tarix müəllimi Müşfiq Dadaşov, liseyin şagirdi Nüranə Abdullayeva və rayon ağsaqqallarından Akif Kazımov çıxış edərək  Konstitusiyamızın hüquqi sənəd kimi tarixi əhəmiyyətindən danışdılar.

Sonda məktəblilərin hazırladıqları kompazisiya nümayiş olundu.