Biləsuvar rayon Təhsil işçilərinin konfransı keçirildi.

03 sentyabr 2015-ci il tarixdə Biləsuvar rayon Heydər Əliyev Mərkəzində rayon Təhsil işçilərinin  konfransı keçirildi.
Tədbirdə Biləsuvar rayon İcra Hakimiyyəti Başçısının müavini Xəyalə Qəmbərova, Təhsil Nazirliyinin məsul işçisi Elmir Həsənov, təhsil işçiləri, məktəb direktorları, müəllimlər və  kütləvi informasiya vasitələrinin nümayəndələri iştirak etdi.
Tədbir iştirakçıları əvvəlcə Heydər Əliyev  parkında  Ulu Öndərin abidəsini ziyarət etdilər, əziz xatirəsinə tər çiçəklər qoydular.
İclası giriş sözü ilə açan  rayon Təhsil şöbəsinin müdiri Balaqardaş Kazımov konfransın gündəliyi barədə məlumat verdikdən sonra ötən 2014-2015-ci tədris ilində təhsil sahəsində görülmüş işlər  və 2015-2016-cı tədris ilində qarşıda duran məsələlər barədə ətraflı məruzə etdi.
Sonra M.İbrahimov adına Biləsuvar liseyinin direktoru Bəhruz Mehdiyev,  Əsgərabad kənd tam orta məktəbinin direktoru Fəzail Rəhimov, gənc müəllimə Səkinə Abbaslı  çıxış edərək  Azərbaycan Respublikasının Prezidenti cənab İlham Əliyevin və    Heydər Əliyev Fondunun prezidenti,  Milli Məclisinin deputatı, UNESCO və İSESCO-nun xoşməramlı səfiri Mehriban xanım Əliyevanın ölkəmizdə təhsilin inkişafına  göstərdikləri yüksək diqqət və qayğıya görə rayonun çoxminlik pedaqoji kollektivi adından təşəkkürlərini bildirdilər.
Təhsil Nazirliyinin məsul işçisi Elmir Həsənov çıxış edərək ölkəmizdə aparılan təhsil islahatları barədə ətraflı məlumat verdi. Elmir Həsənov təhsil sahəsində rayonda son illər görülmüş işləri yüksək qiymətləndirərək bunun builki ali məktəblərə qəbulda da özünü büruzə verdiyini qeyd etdi.
Konfransda Biləsuvar rayon İcra Hakimiyyəti Başçısının müavini Xəyalə Qəmbərova çıxış edərək bildirdi ki,  məhz Ulu Öndər Heydər Əliyev tərəfindən əsası qoyulmuş Milli Təhsil strategiyasının əldə etdiyi uğurlar  Azərbaycan təhsilinin dünyanın inkişaf etmiş təhsİl sisteminə inteqrasiyasını təmin etmişdir. Respublikamızda təhsil sahəsində aparılan islahatlar,  bu sahədə yeni qanunvericilik bazasının formalaşdırılması, yeni-yeni fərman və sərəncamların imzalanması ümumilikdə dövlətimizin və xalqımızın inkişafına xidmət edir. Respublika  Prezidenti  cənab İlham Əliyevin 24 oktyabr 2013-cü il tarixli Sərəncamı ilə təsdiq edilmiş “Azərbaycan Respublikasında  təhsilin inkişafı üzrə Dövlət Strategiyası”  Azərbaycanın  yeni inkişaf konsepsiyasına və qabaqcıl beynəlxalq təcrübəyə uyğun rəqabət qabiliyyətli  təhsil sisteminin qurulması istiqamətində strateji hədəfləri  müəyyən edir. Aparılan islahatlar təkcə bunula məhdudlaşmır.  Respublikamızda  yeni-yeni təhsil ocaqlarının  inşa olunması, əsaslı təmiri, eləcə  də xarici ölkələrdə gənclərimizin təhsilinin davam etdirilməsindən ötrü həyata  keçirilən tədbirlər  də bu islahatların tərkib hissəsidir.
    X.Qəmbərova bildirdi ki, ötən illər ərzində rayonumuz  da ölkə təhsilinə öz töhvələrini vermişdir. Ayrı-ayrı  ali təhsil müəssisələrin məzunları olan biləsuvarlılar  hazırda respublikamızın ən müxtəlif  fəaliyyət sahələrində çalışırlar.Rayonumuzda yeni istifadəyə verilən  təhil  ocaqları, inşa və əsaslı təmir olunan məktəb binaları  təhsilin keyfiyyətinin yüksəlməsinə birbaşa təsir göstərən mühüm amillərdir. Əlbəttə bu uğurlar həm də   Biləsuvar rayonun təhsil müəssisələrində çalışan  pedoqoji  kollektivlərin gərgin əməyi sayəsində mümküm olmuşdur.
Respublikamızda, o cümlədən,  rayonumuzda  təhsil müəssisələrinin maddi-texniki bazasının möhkəmləndirilməsindən ötrü Heydər Əliyev Fondunun  həyata keçirdiyi  “Yeniləşən Azərbaycana yeni məktəb” layihəsi çərçivəsində  rayonumuzda 4 yeni məktəb binası tikilərək  istifadəyə verilmişdir. Ümumilikdə son illər rayonumuzda  13 yeni məktəb tikilmiş  6 məktəb  yüksək səviyyədə əsaslı  təmir olunaraq istifadəyə  verilmişdir.Ötən tədris ilində Xırmandalı kənd 2 saylı, Aşağı Cürəli, Amankənd  tam  orta  məktəbləri üçün müasir standartlara cavab verən yeni məktəb binaları tikilmiş və 1176  yerlik   Ağalıkənd  kənd  tam  orta məktəbi əsaslı şəkildə  təmir  olunaraq pedoqoji  kollektivin  və  şagird  kontingentinin  istifadəsinə  verilmişdir. Hal-hazırda isə rayonun Əsgərabad kənd tam orta məktəbində əsaslı təmir işləri aparılır.
X.Qəmbərova  qeyd etdi ki, qarşıdan növbəti tədris ili gəlir. Əmin olmaq istərdik ki, bu yeni tədris ilində də Biləsuvar rayonunun təhsil işçiləri əzmlə çalışacaq və respublikamızda təhsil strategiyasının həyata keçirilməsi işinə öz töhvələrini verməkdə davam edəcəklər.
Konfransın sonunda  iştirakçılar adından Azərbaycan Respublikasının Prezidenti cənab İlham Əliyevə müraciət ünvanlandı.