Biləsuvar rayonunda əhalinin tibbi müayinədən keçirilməsi davam edir.

Azərbaycan Respublikasının Prezidenti cənab İlham Əliyevin tapşırığına  uyğun olaraq  respublikamızın hər yerində olduğu kimi Biləsuvar rayonunda  da 3 fevral 2015-ci il tarixdən etibarən əhalinin tibbi müayinədən keçirilməsi aksiyası başlanılmışdır.Hazırda rayon əhalisinin tibbi müayinədən keçirilməsi uğurla davam etdirilir.

Tədbirin yüksək səviyyədə icrası məqsədilə  Biləsuvar rayon İcra Hakimiyyəti Başçısının 03 fevral 2015-ci il tarixli Sərəncamı imzalanmışdır. Sərəncama əsasən  əhalinin tibbi müayinədən keçirilməsinin nəzərdə tutulmuş müddətdə (02 fevral – 01 may  2015-ci il tarixə)  başa çatdırılmasını təmin etmək məqsədilə müvafiq  komissiya yaradılmış,  müayinənin rayonun bütün idarə, müəssisə, və təşkilatlarının  kollektivlərini,   yaşayış məntəqələrini əhatə etməsi üçün qrafiklər tərtib  olunmuşdur. Tibbi müayinənin keyfiyyətlə həyata keçirilməsini təmin etmək məqsədilə tibb müəssisələri hazırlıq vəziyyətinə gətirilmiş və  ixtisaslı həkimlərdən ibarət briqadalar yaradılmışdır.Aidiyyəti şəxslərə,  şəhər və kənd inzibati ərazi dairələri üzrə nümayəndəliklərə  tapşırılmışdır ki, kollektivlərinin və  əhalinin  tibbi müayinədən keçirilməsində səhiyyə işçilərinə yaxından köməklik göstərsinlər, əhali arasında müvafiq təşkilati-izahat işlərinin aparılmasını təşkil etsinlər.

Ötən il  əhalinin 83398 nəfəri tibbi müayinədən keçmişdir ki, bu da  87,1 faizini təşkil etmişdir.Tibbi müayinənin  nəticələrinə  görə 2347 nəfər ambulator,180 nəfər stasionar müalicəyə cəlb olunmuş, 195 nəfər respublikanın  müxtəlif  təyinatlı  tibb ocaqlarına  göndərilmişdir.

2015-ci ilin müayinəyə başlanılan ilk bir ayı ərzində isə rayon əhalisinin 38672 nəfəri tibbi müayinədən keçmişdir.

Yerli mətbuat orqanlarında, idarə, müəssisə və təşkilatlarda, ümumtəhsil müəssisələrində, şəhər və kənd yaşayış məntəqələrində  əhalinin tibbi müayinəyə tam cəlb olunması üçün   maarifləndirmə işləri aparılır.