"Qardaşlaşmış məktəblər" layihəsi çərçivəsində Biləsuvar məktəbliləri Gədəbəy rayonunda olmuşlar

       Azərbaycan Respublikasının Prezidenti Yanında  Bilik Fondunun "Qardaşlaşmış məktəblər"  layihəsi  çərçivəsində Biləsuvar şəhər 4 saylı tam orta məktəbi ilə Gədəbəy  rayon Slavyanka kənd 1 saylı məktəbi qardaşlaşmışlar. Layihənin əsas  məqsədi   məktəblər arasında dostluq, qardaşlıq əlaqələri yaratmaqdan, bilik mübadilələri aparmaq, yarışlar təşkil etmək eləcə də rayonların tarixini, adət-ənənələrini  öyrənmək, regionlarda həyata keçirilən  irimiqyaslı infrastruktur layihələr, sürətli abadlıq, tikinti-quruculuq işləri ilə yaxından tanış olmaqdan ibarətdir.
         10-11 sentyabr 2014-cü il tarixlərdə layihə çərçivəsində Gədəbəy rayonunda  məktəblər arasında ilk görüş keçirildi. Biləsuvar məktəbliləri səfər çərçivəsində  rayonunda  Azərbaycan xalqının ümummilli lideri Heydər Əliyevin abidəsini ziyarət edərək, abidə önünə  gül dəstələri qoymuşlar və rayonun tarixi yerlərini gəzmişlər.
       Sonra  Gədəbəy  rayon Slavyanka kənd 1  saylı məktəbində  “Qardaşlaşma Sazişi”  imzalandı. “Qardaşlaşma Sazişi”-ni Slavyanka kənd 1 saylı məktəbinin direktoru Mətanət Hüseynova və  Biləsuvar şəhər 4 saylı tam orta məktəbin direktoru Əli Əliyev imzaladılar. Hər iki məktəb bir-birlərinə məktəblərini təmsil edən rəmzi  hədiyyələri  təqdim etdilər.  Məktəbdə şagirdlər arasında intellektual yarış təşkil edildi. Maraqlı və gərgin bilik mübarizəsi şəraitində keçən yarışda Biləsuvar şəhər 4  saylı tam orta məktəbin komandası qələbə qazandı.
      Yarış iştirakçılarına Bilik Fondu tərəfindən təsis edilmiş  kubok və  qiymətli hədiyyələr təqdim edildi.
       2 gün çəkən səfər zamanı məktəblilərimiz Gədəbəy   rayonunun tarixi və görməli yerlərində oldular.